ζــــڭــاﯿــۂ ๐ـــړl۾

مع مرور الايام ادركنا ان لازم قعدتنا الدايمة و الكتيرة تكون عند بابا و ماما الحقيقيين
و كان احساسنا متقطع ياتري نسيب جدي و جدتي و لا نسيب بابا و ماما؟..
كنا بنحس بشوق لجدي و جدتي لما نقعد في بيتنا..
و لما نروح عندهم نحس بشوق لبابا و ماما..
و كنا علي الحال ده كتير..
و ماكنتش اعرف اجابة لو حد سالني بتحبي مين اكتر فيهم كلهم؟..
ازاي اجاوب علي سؤال زي ده..ازاي افرق بينهم..
كلهم بحبهم قد بعض..


في الوقت ده انا كنت بأتعب كتير..
و بدأ تعبي و انا 3سنين اساسا
و كانوا بيقولوا ليا ان مرة حسوا اني خلاص هأطلع في روحي و خلوني علي السرير
و ماكنوش عارفين يعملوا ليا ايه..
كان عندي ضعف دائم و هبوط و مش بآكل حاجة..
حتي انهم كلموا أهل بابا و خلوهم ييجوا يزوروهم علشان يعرفوا اني تعبانة
و ان مش بإيدهم حاجة و علشان يصدقوا لو حصلي حاجة و مت..


و فضلت ضعفانة و تعبانة كتيرة..
حتي لغاية دلوقتي

المهم في الفترة قبل المدرسة
كنت انا و اخويا قريبيين جدا لبعض.
ماكنش حد بيعرف سرنا انا و هو..
و لغاية دلوقتي احنا كده..
افتكر اني و هو كنا بنعمل حاجات مع بعض و مقالب لبابا و ماما..
كنا بنغير كل شئ و هما في الشغل و نقلب البيت كله..
بس قبل رجوعهم للبيت كنا بنرجع كل حاجة لمكانها و كأن مافيش حاجة خصلت..

كنا بنام علي سرير واحد و احنا ماسكين بعضنا و حاضنين بعض..
كنا بناكل نفس الاكل و نتفق عليه و نتشاور في كل حاجة..
كنا بنألف قصص و حكايات و نلعب تمثيليات و أفلام مع بعض..
نهزر و نضحك و نموت من الضحك ..
ياااااه كان عندنا ترابيزة سفرة ضخمة جداااااااا
كنا بنقعد تحتها و نبني مستعمرة من القماش و الخيط و نكون خيمة نقعد فيها و معانا العابنا..

افتكرت موقف انا و اخويا عملناه في جارتنا..
جبت جلابية بفيونكة من عند الصدر كده بتاعتي
و خليت اخويا يلبسها و عملتله توكة في شعره علي اليمين و علي الشمال..
اصل شعر اخويا ناعم جدا و بيسموه الشعر الخيلي..
و حطيتله كحل في عينيه من بتاع ماما..
و قلتله تعالي و روح لجارتنا خبط عليها و قولها عندك ميه يا طنط اصلها مقطوعة عندنا..
وفعلا خبط عليها و هو شكله بنوتة..
و فتحتله و سألها و بعدها قالتله:انتي مين يا قمر يا حلوة
قالها:انا بنت جارتك اللي قصادك..
ههههههههههههههههههه

افتكر كنا بنعمل طيارات ورق و نطيرها من الشباك و البلكونة
و نعمل لعبة فقاعات الصابون و نطيرها من الشباك برضه
ياااه كان بينااوقات جميلة
يااااا وحشتني الايام دي..هأعيط بجد من اني بأفتكرها



و وقت قبل المدرسة كان اخويا مقبل علي الفهم اكتر مني..
و فعلا هو اذكي مني بكتير..
تقدروا تقولوا انه اتعلم كلمات عربي و انجليزي كتيرة قبل دخوله للمدرسة
و كان بيستقبل اي معلومة تجيله و يحب يسأل و يعرف اكتر من اللي قصاده..
لكن أنا كنت هبلة و غبية..هههههه
لألأ مش كده بس كنت مش بأحب زيه المعرفة الكتير..بمعني اصح هو كان شاطر و ذكي و انا عادية..


و جاءت وقت المدرسة..
انا فرحت باللبس بتاع المدرسة و كنت مبسوطة..
لكن لما دخلت المدرسة عيطت و بكيت و هريت نفسي عياط
و ماما كانت هتعيط علشاني و صعبت عليها..
و دخلت معايا لجوه الفصل..
و الفصل كان فيه شباك كبير علي حوش المدرسة وقفت فيه طول اليوم..
و قعدت تشاور ليا و تقولي من بعيد انا جنبك..
يا حبيبتي يا ماما


المهم شوية شوية بدأت ادخل الفصل و ماما تمشي و مش تقفلي في الشباك..
اتصاحبت علي اللي معايا في المدرسة و كنت بأحبهم جدا جدا..
بس كانت فيه بنت في سنة خامسة ابتدائي تعاكسني دايمات..
و كانت ماشاء الله كبيرة و ضخمة و وزنها يفصل بنت في ثانوي او اكتر..
و كانت تلم بنات زيها و تخطف مني الساندوتشات و الفلوس و مش انا بس ..
لأ كانت بتعمل كده مع بنات كتيرة..
و بما اني قريبة من ماما فقلت اقولها و عرفتها فعلا..
و ماما جت و عرفتها و اشتكت للمديرة و زعقوا للبنت و عرفوها غلطها..
و البنت دي بقت بعد كده صاحبتي..تصدقوا..
اتقربت منها و عرفت ظروفهاو كانت بتعيط و هي بتحكيلي و فضلت جنبي لما راحت سنة سادسة و انا كنت في سنة تانية ابتدائي



كانت المدرسة كلها بتحبني..
كنت صغيورة كده و مش باينة من الأرض و كانوا بيسموني"كتكوتة"
و كانوا يحبوا يتكلموا معايا و يلاعبوني و يبوسوني..
و كنت ظاهرة بالمدرسة علشان بأحب الاذاعة المدرسية و كنت مشتركة فيها

و كنت في سنة تانية ابتدائي
و جت مدرسة عربي و دين جديدة..
دخلت و تزعق و تشخط..
و قالت هأسألكم اسئلة..
و كان السؤال "من اول من اسلم في الاسلام من الرجال؟"
شاورت عليا و هي بتزعق و قالتلي:انت يا هانم انت..تعالي هنا..
روحتلها و انا خايفة من شكلها و صوتها و قالتلي جاوبي..
فقلتلها الاجابة بصوت هادي"ابو بكر الصديق"
هي قالتلي و هي مش سامعة ماتجاوبي يا حمارة و زقتني و خبطتني بقبضة ايديها في كتفي..


بما اني ضعيفة و كنت فعلا دايما عند دكاترة
الخبطة بتاعت المدرسة وجعتني و قعدت اعيط
و روحت البيت و ماما و هي بتغير ليا لبسي شافت حتة أزرق بجسمي في كتفي
و سالتني و قلتلها..

جت ماما معايا المدرسة..
و بقت تزعق و تشخط و المدرسين جاؤا علي صوتها..
و جت المدرسة و ماما قالتلها بنتي شاطرة و كويسة ليه بتضربيها في جسمها..
و ياللا اساليها كده اي سؤال..
علشان قالت لماما بنت مش عارفة حاجة و مش بتفهم..
و فعلا سألوني و انا واقفة اسئلة كتير و جاوبت كل حاجة
و الكل أثني عليا و فرح بيا..
اعتذرت المدرسة و بعدها برضه بقت تحبني و قريبة مني..



و جاءت اخر سنة تانية ابتدائي و جت الصدمة معها
و فات من حياتي شخص مهم..
شخص أحبه كتير و لسه بأحبه..
شخص فقدناه كلنا و تأثرنا بيه..
شخص ماتت معاه جزء كبير في قلبنا..هو جدي-والدماما-
ياااه صدمة للكل..لانه كان قريب مننا كلنا و كان بيحبنا..ربنا يرحمه و يغفر له و يكتبله الجنة ان شاء الله


و كانت ميولي في الابتدائي للرسم
كنت بأحب الرسم جدااااااااااااا..
و بالأخص رسم المنازل و البيوت و اتفنن فيها..
و اتذكر استاذ الرسم و هو اللي حببني في الرسم
"استاذ شاكر"..ياااه كان استاذ عنده اعاقة شوية في رجليه..
كان بيهتم برسوماتي و الاشكال اللي بأعملها..
و فعلا بقيت مشهور في المدرسة لدخولي مسابقات المدرسة للرسم..
و بقيت المشرفة الفنية للفصل و كل سنة اكون مشرفة فنية للفصل اللي اكون فيه..
و كان بالانتخاب الاشراف ده..
انتخاب بين تلاميذ و تلميذات الفصل.